ఉ. అమ్మలగన్న యమ్మ - 100 పద్యాలు

 

ఉ. అమ్మల గన్నయమ్మ

అమ్మల గన్నయమ్మ, ముగురమ్మల మూలపుటమ్మ, చాల పె
ద్దమ్మ, సురారులమ్మకడుపాఱడిపుచ్చినయమ్మ, తన్నులో
నమ్మిన వేల్పుటమ్మల మనమ్ములనుండెడియమ్మ, దుర్గమా 
యమ్మ కృపాబ్ధి యీవుత మహత్వ కవిత్వ పటుత్వ సంపదల్.

1.     అమ్మల గన్నయమ్మ

2.    ముగురమ్మల మూలపుటమ్మ

3.    చాల పెద్దమ్మ

4.    సురారులమ్మకడుపాఱడిపుచ్చినయమ్మ

5.    తన్ను లోనమ్మిన వేల్పుటమ్మల

6.    మనమ్ములనుండెడియమ్మ

7.     దుర్గ మా యమ్మ 

8.    కృపాబ్ధి యీవుత 

9.    మహత్వ కవిత్వ పటుత్వ సంపదల్. 

 

అర్ధాలు:

అమ్మలన్ = అమ్మలను; కన్న = మించిన; అమ్మ = తల్లి; ముగురు అమ్మల = లక్ష్మి, సరస్వతి ,పార్వతి లకి; మూలపు = మూల మైన; చాలన్ = చాలా; పెద్దమ్మ = పెద్ద అమ్మ; సురారుల అమ్మ = రాక్షసుల యొక్క తల్లి; ఆఱడిపుచ్చిన = దుఃఖపెట్టిన; అమ్మ = అమ్మ; తన్ను = తనను; లోన్ = (మనసు) లోపల; నమ్మిన = నమ్మిన; వేల్పుల అమ్మల = దేవతల తల్లుల; మనమ్ముల = మనసులలో; ఉండెడి = ఉండే; దుర్గ = దుర్గాదేవి; అమ్మ = అమ్మ; కృప + అబ్ధి = దయా సముద్రముతో; ఇచ్చుత = ఇచ్చుగాక; మహత్త్వ = గొప్పదైన; కవిత్వ = కవిత్వంలో; పటుత్వ = పటుత్వమనే; సంపదల్ = సంపదలు.

భావం: ఈ పద్యం పోతన వ్రాసన భాగవతంలోనిది. కావ్యంలోని ఇష్టదేవతారాధన పద్యాలలోనిది.

 

ఆమె అమ్మలకే అమ్మ. చాలా పెద్దమ్మ. సరస్వతి, లక్ష్మి, పార్వతి ఈ ముగ్గురికీ మూలమైన తల్లి. మహాబలవంతులైన రాక్షసులను మట్టుపెట్టింది. తనను నమ్మిన దేవతల తల్లుల హృదయాలలో కొలువుంటుంది. అలాంటి దుర్గమ్మ నాకు ఈ భాగవతాన్ని తెలుగులో రాసే గొప్ప కవిత్వ శక్తిని సామర్ధ్యాన్ని ప్రసాదించుగాక అని భావం.

Comments