మ. సిరికిం జెప్పడు - 100 పద్యాలు

 

మ. సిరికిం జెప్పఁడు
సిరికిం జెప్పఁడు; శంఖచక్ర యుగముం జేదోయి సంధింపఁ డే పరివారంబును జీరఁ డభ్రగపతిం బన్నింపఁ డాకర్ణికాం తర ధమ్మిల్లముఁ జక్క నొత్తఁడు వివాదప్రోత్థితశ్రీకుచో పరి చేలాంచలమైన వీడఁడు గజప్రాణావనోత్సాహియై.
1.    సిరికిం జెప్పఁడు;  2.    శంఖచక్ర యుగముం జేదోయి సంధింపఁడు 3.    ఏ పరివారంబును జీరఁడు 4.    అభ్రగపతిం బన్నింపఁడు	5.    ఆకర్ణికాంతర ధమ్మిల్లముఁ జక్క నొత్తఁడు 6.    వివాదప్రోత్థిత  7.    శ్రీకుచో పరిచేలాంచలమైన వీడఁడు 8.    గజప్రాణావనోత్సాహియై.
అర్థం:  సిరికిం = లక్ష్మీదేవికి; చెప్పఁడు = చెప్పలేదు ; శంఖ = శంఖము; చక్ర = సుదర్శన చక్రము;యుగముం = రెండింటిని; చేదోయి = రెండు చేతులలోనూ; సంధింపఁడు = ధరించలేదు; ఏ పరివారంబును = తన చుట్టు ఉన్నవారిని; చీరఁడు = పిలువలేదు; అభ్రగపతిం =గరుత్మంతుడిని ; బన్నింపఁడు = పిలువలేదు; ఆకర్ణికాంతర = చెవుల మీద పడుతున్న;ధమ్మిల్లముఁ = జుట్టును; చక్కనొత్తఁడు = సర్దుకోలేదు; వివాద = తగవు వలన; ప్రోత్థిత = ఎత్తిన;శ్రీ = లక్ష్మీదేవి యొక్క; కుచ = గుండెల మీద; పరి చేలాంచలము = చీర కొంగు; ఐన =అయినా; వీడఁడు = విడువలేదు; గజ = గజేంద్రుని; ప్రాణా = ప్రాణాలను; వనోత్సాహియై =రక్షించాలనే తొందరలో;
భావం:  గజరాజు ప్రాణాలను కాపాడాలన్న తొందరలో శ్రీహరి, లక్ష్మీదేవికి చెప్పలేదు; శంఖ చక్రాలను ధరించ లేదు; తనవారిని ఎవరినీ రమ్మనలేదు; గరుత్మంతుడిని రమ్మనలేదు; చెదరినజుట్టును కనీసం సర్దుకోలేదు; (ఆటలో తలెత్తిన) వివాదం మూలాన  తాను పట్టుకున్న లక్ష్మీదేవి చీర కొంగును సైతం విడిచిపెట్టలేదు.