కుమారీ శతకం - పరిచయం

నిన్న అమ్మ ద్వారా తెలిసిన విషయం. 1960-1970ల కాలం వరకూ, "కుమారీ శతకం" అనే పద్యాలు ఆడవాళ్లకు నేర్పేవారట. 

ఈ శతకంలో ఆడవాళ్లు,  అత్తవారింట్లో అందునా ఉమ్మడి కుటుంబాలలో, మెసలుకునే పద్ధతి గురించిన పద్యాలు ఉన్నాయి. నలుగురు ఉన్న కుటుంబాలలో ఎలా సర్దుకు పోవాలో చెప్పే పద్యాలు ఇవి.  కోపం చేయకు, బాధ పడకు, మనసులో పెట్టుకోకు, సర్దుకుపో, మాట విను - ఇలాంటి నీతులతో నడిచే పద్యాలు.  కాలక్రమేణా ఉమ్మడి కుటుంబాలు లేకపోవడంతో, మారిన విలువలతో ఆ పద్యాలకూ కాలం చెల్లింది. 

ఈ పద్యాలు వ్రాసినది పక్కి వేంకటనరసింహ కవి. క్రింది లింకులో లభిస్తున్న పుస్తకం 1932లో ముద్రించబడినది. మొదటి ముద్రణ 1869లో జరిగినదని వికీపీడియా ద్వారా తెలుస్తున్నది. అన్నీ కంద పద్యాలు.

ఇదిగో ఆ పద్యాలకు లింకు. https://archive.org/details/SaiRealAttitudeManagement-Telugu-Devotional-Spiritual-Free-eBooks-Satakalu/SH015-KumariShatakmu

మచ్చుకు కొన్ని పద్యాలు:

ఆటల బాటలలో నే మాటయు రాకుండఁ దండ్రి మందిరమందున్
బాటిల్లు కాపురములో వాటమెఱిగి బాలతిరుగ వలయు కుమారీ - #2

నోరెత్తి మాటలాడకు మాఱాఁడకు గోపపడిన మర్యాదలలో
గోరంత తప్పితిరుగకు మీఱకు మీయత్తపనుల మెలఁగు కుమారీ - #10

కూతురు చెడిగై యుండిన మాతది తప్పన్న మాట మదినెఱుగుదుగా
నీ తలిదండ్రులకు నపఖ్యాతులు రానీయగూడదమ్మ కుమారీ - #18

అత్తపయిన్ మరదలిపయి నెత్తిన కోపమున బిడ్డ నేడ్పించుటకై
మొత్తినదనకే కీడగు చిత్తములో దీని చింతసేయు కుమారీ - #28

ఈ పద్యాలు చదువుతుంటే 100-150 సంవత్సరాల క్రింతం నాటి ఆలోచనా సరళి అర్ధమవుతుంది. మగడు తిట్టినా, కొట్టినా కోపగించుకోకు, మగడు జారుడైనా సర్దుకుపో, రాత్రిపూట కాళ్లు పట్టు వంటి నీతులు మారిన కాలంతో పాటుగా, ఇప్పడు వింటే మోటుగా ఉంటాయి. కానీ మొత్తంగా చూస్తే "నొప్పింపక, తానొవ్వక తిరుగువలె" అన్నది స్పష్టమౌతుంది. రాబోయే సంసార జీవితాన్ని ముందుగా చూపించే ప్రయత్నం కనబడుతుంది.

"నీతులన్నీ ఆడవాళ్లకేనా, మరి మగవాళ్లకో?" అని ప్రశ్నించేవారికి, ఆ కవి ద్వారానే రచించబడిన "కుమార శతకం" ఉన్నది.