అరణ్యకాండ: 1110-1119 - సీత ఆభరణములు ఋష్యమూక పర్వతం మీద వేయుట - రంగనాథ రామాయణం
సందర్భము: సీత తన ఆభరణములు మూట గట్టి ఋష్యమూక పర్వతం మీద వేయుట.
అరణ్యకాండ: 1110-1119
ననిమిష పథమున కంత రావణుఁడు - చన రయంబున సీత చరణ నూపురము -
సురవైరి కుత్పాత సూచకం బగుచు - నురువడిఁ జనుదెంచి యుల్కయై పడియె
జగతిపై జాహ్నవి జలధార లొలుకు - పగిది నయ్యాకాశపథమున నుండి
చెలువ కుచంబులఁ జెందుహారములు - దెలియ కందంద మేదినిఁ దెగిపడియె
నాలోన సీత హాహారవం బంది - లోలోనఁ గడు నడలుచుఁ బోయి పోయి
యట ఋశ్యమూకంబు నందు వానరులు - పటుసత్త్వులేవురఁ బరికించి కాంచి
తనవస్త్రమునఁ గొంత తగఁ జించి పుచ్చి - తన భూషణంబులు దానె బంధించి,
వీరైన రామ భూవిభున కీవార్త - లారయఁ దెలుపరే యనుబుద్ధి నపుడు
దడయక రాముచే దశకంఠుఁ డింకఁ - జెడు నంచు ముడియు వైచిన విధంబునను
వారిమధ్యంబున వైచుచుఁ బోవ - వారును దాఁచిరి వడిఁ బుచ్చి దాని
భావం: ఆకాశమార్గాన రావణుడు, సీతను అపహరించి తీసుకుని వెడుతున్నప్పుడు, ఆ రాక్షసునికి అశుభసూచకంలాగా, సీత కాలి మువ్వ జారి ఆకాశంలో ఉల్కలాగా పడిపోయింది. భూమి మీదికి గంగా ప్రవాహం వచ్చు రీతిగా ఆకాశం నుండి ఆమె గుండెల మీది హారములు నేల మీదకు తెగి పడిపోయినాయి. సీత, క్రిందనున్న వానరులను చూసి, తన వస్త్రములో కొంత చించి, తన ఆభరణాలను మూటగా కట్టి, "వీరైనా శ్రీరామునకు ఈ వార్త తెలుపుతారేమో" అనుకుంటూ వారి మధ్యకు, రాముడు రావణాసురుడిని క్రిందకు పడగొట్టు విధముగా, క్రిందకు పడేసింది. వారు కూడా ఆ మూటను తీసుకుని దాచిపెట్టారు.
--
ఆరయు
Comments
Post a Comment